مصر اللى مش ف دماغها !!!

معلوماتي

الاسم: عادل حجازى
البلد: مصر
التصنيفات : خاصة,عام

أظهر كافة المعلومات
راسلني
أحدث الإدراجات
المزيد
روابط
الأرشيف
تصنيفات
- اسلاميّات (10)
- ندوات (4)
- خواطر رمضانية (5)
- المستهبلين فى امّها... (3)
- مصر اللى مش ف دماغها !!!... (7)
- المستهبلات فى امها... (18)
- قصة قصيرة (6)
- شعر غنائى (14)
- قصائد (10)
- منكوبيات (3)
- مختارات (1)
- سفاح النمسا ..والذين لاي... (1)
- مناقشات حرّة و استفتاءات... (10)
- صورة …و…تعلي... (6)
- مقالات (34)

عدد الزائرين

61267
أحدث التعليقات
- الجوّال على عجائب الدنيا المصرية (4) – مصر اللى مش ف دماغها !!!
- عادل سعيد على عجائب الدنيا المصرية (4) – مصر اللى مش ف دماغها !!!
- عادل سعيد على عجائب الدنيا المصرية (4) – مصر اللى مش ف دماغها !!!
- حسن محمد توفيق على عجائب الدنيا المصرية(5)- مصر اللى مش ف دماغها !!!
- عادل حجازى. على عجائب الدنيا المصرية (4) – مصر اللى مش ف دماغها !!!
- عادل حجازى. على عجائب الدنيا المصرية (4) – مصر اللى مش ف دماغها !!!

اضغط فقط على العنوان لتدخل على الإدراج مباشرة ً

مكتوب اللى مش فى دماغها

قصائد

عادل امام ..زعيم فعلا ؟!!

الصهصلق والعصلبى ّ!!

عجائب الدنيا المصرية(5)- مصر اللى مش ف دماغها !!!

نوفمبر 7th, 2009 كتبها عادل حجازى نشر في , مصر اللى مش ف دماغها !!!,

فى الحيطان والمبانى والبلكونات !!

** انك تلاقى حيطة فى شارع مفيش عليها أثر من حمض البوليك فى ركنها !!

** انك تلاقى حيطة مش محطوط عليها ..حاجة من الحاجات دى :

- صاروخ الكيمياء ..مسعد ماندليف ..مدرس الانجليزية الأول فى مصر ..مستر انجليش مِش عِفش ..عملاق الفرنسية الأوحد مسيو ماجد بلاتينى !!…إلى آخر وحوش التدريس فى القطر المصرى العزيز !!

- صورة حد تايه …مفقود من 9 سنين ..ابوس ايديكم رجّعوه !! ( طيّب ضاع ازاى ؟!!..وليه ؟؟!! )

- صورة مرشح فى انتخابات عدّى عليها 5 سنين ..ولسّه صورة مرزوعة على الحيطان وعواميد النور !!

- اعلان – شبه ثابت فى تفاصيله – مطلوب مندوبين ومندوبات بيع ..بخبرة أو بدون ..مؤهلات أو صيّع ..حراميّة أو ولاد ناس ..مرتب مجزى ( ابقى قابلنى!! ) + عموله ( يا ولاد الكدّابه!! ) + تأمين طبى وصحى ( على أساس ان احنا داقّين عصافير !! )…وبعدين شركة النصب وتلبفوناتها !!!

- شقة للايجار ..شرحة وبرحة وسرحة !!

- عبارات غرام خالدة ..احمد وبعدين قلب جواه سهم وسمسمة !!…أو ..ماجد بيحب سهام …شوشه بتحب عماد الكينج !!..إلى آخر قائمة العشّاق الملتهبة !!

- عبارت تعريف خالدة : مجدى بروسلى ..بجوار سينما الشرابية ( دى تقريبا على حيطان القاهرة كلها !!) ..الاديب عفيفى فى كتابه المعجزة ( أزمة السلطان والصولجان والبدنجان !! )

- بحبك يا منير ( محمد منير يعنى ! ) ..ابتدت تغزو حيطان وسط البلد !!

- وائل بخت ..وكريم الدش ..وبالم ترى ..والجوهرى ..ورومة ..ايمن سرنجة ..الصعيدى …غراب !!! ( دى اسماء شلّة ظريفة مخلّدة نفسها على الحيطة من شلل أشبالنا وأبنائنا وأولادنا الأعزاء.. طلبة الثانوية العامة !!!!!

** انك تلاقى حيطة سليمة ..مش مدغدغة !!

** انك تلاقى حيطة لونها نفس اللون اللى اتبنت بيه !!

** انك تلاقى حيطة عليها رسومات شيك ..أو ألوان حلوة ..أو لمسة جمالية ..زى أوربا !!!

فى مبانى و عماراتها مصر

** انك تلاقى عمارات مصر كلها متغطّية ومفيش حاجة اسمها بيت متساب بالطوب الاحمر ..والتشطيب دا على حساب الحكومة ..يعملوا حاجة ف حياتهم ..مش مُكلّفة قوى يعنى !!

** انك تلاقى عمارة مفيش على سطحها أطباق الدش التى تذكرك بافلام الخيال العلمى ..شوفوا نظام تانى ..زى أمريكا …

المزيد

عجائب الدنيا المصرية (4) – مصر اللى مش ف دماغها !!!

نوفمبر 3rd, 2009 كتبها عادل حجازى نشر في , مصر اللى مش ف دماغها !!!,

فى التاريخ ..والرموز..والمهموز !!!

** بُناة الأهرام مش الفراعنة ..الكنعانيين ( بحث علمى ) !!

**الفراعنة مش أجداد المصريين ..دول كائنات فضائية ..بأمارة النقوش الهيروغليفى على سطح القمر ( نحس علمى !! )

** الفراعنة مش همّ اللى بنوا المسلّات والمتاحف والمعابد والحجارة دى ! أمال مين يا نجم ؟! ..الفلبينيين ( هلس علمى !!! )

** الفراعنة كانوا كفار ..وعبدة أوثان ..ومش نافعين ببصلة !!

** الفاطميون كانوا مبتدعة ضايعين!!

** المماليك كانوا انكشارية بايظين !!

** صلاح الدين الايوبى ..كردى مش مصرى !!

** قطز بتاع عين جالوت ..قتل الخاكم وخد مكانه !!

** بيبرس ..قتل قطز وخد مكانه برضه !!

** شجرة الدر ..كانت مجرمة !!

** محمد على باشا ..كان البانى اصلا..وسحل كل معارضيه ..وكان فاكر مصر عزبة ..بيوزع فيها على كيف أبوه !!

**رفاعة الطهطاوى ..كان متفرنج ضال !!

** الامام محمد عبده ..كان بيكتب لقاسم أمين الفاسق بتاع حجاب المرأة فى الخفاء ..خوفا من بطش الأزهر ..وغضب الناس !!

** جمال الدين الأفغانى ..كان أفغانى !!

**احمد عرابى ..بتاع هوجة عرابى ..كان عبيط ..وهو اللى دخل بغباوته الانجليز مصر !!

** الملك فؤاد وفاروق واجدادهم كانوا كلهم خمورجية ..خسئوا أجمعين !!

**سعد زغلول كان قمارتى وخمورجى وكان أزهرى نسى اصله وافتكر نفسه من علية القوم وماهوش زعيم ولا حاجة !!

** مصطفى كامل ( الزعيم مش المطرب !) كان متجوز واحدة فرنسية قد جدّته ..كان مش سوى نفسيا باين عليه !!

** مصطفى النحاس ..كان متجوز واحدة قد حفيدته …زينب الوكيل..كانت أصغر منه بخمسة وعشرين سنة ..وبعدين ..محكمة الثورة ..أثبتت ان زين الوكيل كان عندها 800فدان …يعنى كانوا شاريين مصر هى وجوزها ..حرامى يعنى !!

** جمال عبد الناصر ..جاب لنا النكسة ..وشحّت مصر ..وسجن الشعب المصرى فى المعتقلات ..الله يسامحه مطرح ما راح !!

** انور السادات ..كان افيونجى ..وبيشرب خمرة ..وعميل للأمريكان والصهاينة ..وخلّى الناس ما بين حرامى وما بين شحّات !!

** حسنى مبارك ..معملش حاجة عِدلة خالص لمصر ..لا قبل ما يحكم ..ولا بعد الحكم !!

** الشيخ الشعرواى ..كان صوفى وفاسد العقيدة !!

المزيد

عجائب الدنيا المصرية (3) – مصر اللى مش ف دماغها

أكتوبر 25th, 2009 كتبها عادل حجازى نشر في , مصر اللى مش ف دماغها !!!, مقالات,

فى التعليم …

فى مراحل التعليم الأساسى ( ابتدائى – اعدادى – ثانوى )

** انك ونت فى الابتدائى محدّش يخوّفك بأوضة الفيران ..عشان منتش نافع وما بتسمعش الكلام !

** انّك تعدى مراحل التعليم من غير ما تنضرب بأسلوب من الأساليب دى

1 – بالمسطرة الخشب الطويلة !

2 – بفرع شجرة مختار بعناية فائقة !

3 – بجلدة سير موتور ..أو سيرغسالة ..أشبه بكرباج سودانى صغير جميل !

دى أساليب الضرب المباشر اللى أنا فاكرها !

** أساليب التعذيب بقى – آه ..تعذيب ما تستغربش ! - ..اللى انا فاكرها برضو ..واللى سمعت عنها من اصحابى !

1- المدّ على الرجلين ( قديمة ..عارفينها ! )

2- الضرب بسن المسطرة على ظهر الأيدي..على العظام وش !

3- وضع قلم أو مسطرة بين اصبعين مع هرس الكف بالمسطرة ( ابداع !)

4- القرص خلف عضلة الفخذ !

5- الضرب بالدبّاسة على عضلة الفخذ ..وما ينتج عنه من غرس دبّوس ظريف فى اللحم مباشرة ( ما شفتهاش ..سمعت عنها بس الحمد لله ) !!

6- الضرب المعتاد ..يعنى ..شلاليت وبونيّات ( طبعا مرحلة الثانوى ! )

طبعا ..دة ..غير اساليب التعذيب المعنوى التافهة الفرفورة !

….اطلع بره الفصل !

…..استنانى عند الناظر !

…..ما تجيش بكرة غير ومعاك ولى أمرك !

…..اطلع على الحيطة دى وادى ضهرك لزمايلك وارفع ايديك لفوق !

……قيام …لحد ما الحصة تخلص …كل الفصل !

** انك تشوف مدرسة حماماتها نضيفة !

** انك تشوف مدرس بيشرح فى الدرس ..زى ما بيشرح فى الفصل !

** انك تلاقى كتاب الوزارة ..زى الكتاب الخارجى ( ظاهرة مصرية فذة بجد ) !!

** انك تلاقى التعليم بقى من غير دروس خصوصية ولا حتى مجموعات تقوية !!

** انك تلاقى التعليم اللى بيقولوا عليه مجانى ..فعلا مجانى !!

** انك تلاقى الفصول أخرها 25 تلميذ داخل كل فصل !

** انك تلاقى المدارس كلها فترة واحدة ..مش فترتين وتلاتة والكلام الفارغ دة !

** ان اعمال السنة تبقى تراث ( عشان الضماير بعافية ..والناس بتستخدمها وسيلة ضغط عشان الدروس الخصوصية !!)

** انك تفهم ليه بندرس لغتين فى الثانوى ..انجليزى وفرنساوى ..مادتين فى المجموع ..والدين لأ !!!!!!!!

** انك تلاقى مدرسة ليها معمل متطور فعلا ..مش مجرد ميكروسكوب وكام قارورة !!

**انك تلاقى مدرسة فيها ملاعب متنوعة ..تمارس فيها الرياضة ..وليست مبانى فى مبانى … ناقص تاكل فى بعض !!

** انك تلاقى مدرسة فيها غرفة للموسيقى ( دا عبيط دا ولا ايه !! )

** انك تلاقى المكتبة – بتشجع على القراءة فعلا ..وفيها ناس فاهمين ..وبيعملوا أنشطة بجد !!

** انك تلاقى مسرح مدرسى !!

** انك تلاقى مجلات حائط وصحافة مدرسية ..تتيح فرص الإبداع فعلا ..دون قيود ( إن وُجِدَتْ )

** انك تلاقى الطلبة بيحيوا العلم وبيقولوا النشيد الوطنى بمنتهى الحماس والإخلاص ..مش بمنتهى ال……..!!!

** ان الإذاعة المدرسية يبقى ليها معنى !!

** انك ما تسمعش عن مدرس انضرب بالشلّوت من طالب – خلال عمرك الدراسى !!

** انك تلاقى واحد يوحّد ربنا.. اترفد للأبد ..بسبب الشلّوت دة !!

** انك تشوف وسائل تعليمية جديدة فى المدراس غير السبّورة الخشب , والطباشير الطبّى , والباشاورة ..و…و..

فيه كمبيوتر ..وبروجيكتور ..الناس وصلت القمر يا اخوانّا !!

** انك ما تلاقيش أمن الدولة بتطلب أسماء الطلبة اللى بيرشّحوا نفسهم فى انتخابات الفصول !!

…رائد الفصل ..ونائب رائد الفصل ..ورائد اللجنة الرياضية ..والثقافية ..والملوخية ..والحاجات دى !!

المزيد

عجائب الدنيا المصرية ( 2 ) ( مصر اللى مش ف دماغها )

أكتوبر 21st, 2009 كتبها عادل حجازى نشر في , مصر اللى مش ف دماغها !!!, مقالات,

فى المواصلات ..

مترو الأنفاق:

** انك تلاقى شبابيك المترو مقفولة ..والتكييف شغّال !!

** انك تلاقى المترو ..فيه مكان للوقوف المحترم المناسب للكائنات الحيّة المسمّاة بالبشر !!

** انك تلاقى الناس واقفة طابور مستقيم ..بمنتهى النظام والتحضّر ..فى محطات النزول والطلوع ..وليس طبقا لنظرية لنظرية لكل فعل ..رد فعل ..مساوى له فى القوّة ..ومضّاد له فى الاتجاه !!

** انك تلاقى الستات فى عربية السيدات فقط !!

** انك تلاقى المترو ..ريحته حلوة !!

** انك تحس ان زجاج المترو ومقاعده اتغسلوا قبل كده فى يوم من الأيام !!

** انك ما تلاقيش حد فى المترو بيقرا فى المصحف بصوت عالى ..على أساس إن هوّ فى قريش ..وبيحاول يهدى الكفّار.. !!

** انك ما تلاقيش عيّل فرحان بخيبته ..اقصد ..موبايله …وعمّال يلعب جيمز ع الموبايل بتركيز.. لو ركّز نصّه كان نجح فى الثانوية العمياء بمجموع أكبر من مجموع اينشتاين فى الثانوى !!

** انك تلاقى حد بيقرا الجرنال ..بس فى صفحة غير الرياضة والفن والحوادث !!

** انك تلاقى حد بيقرا فى المصحف ..بصمت ..وخشوع ..ولا تشعر انّه بيراءى ..أو ..مستنى يشوف نظرة الانبهار والاعجاب من حد !!

** انك تلاقى حد ماسك كتاب غير المصحف ..أو ..الجرنال !!

** انك تلاقى مجموعة شباب بيتكلموا مع بعض ..ومش مصرّين يسمّعوا المترو كلّه موضوعاتهم اللى غالبا بتبقى تافهة ..وألفاظهم ..اللى غالبا بتبقى (….) !!

** انك ما تصادفش واحدة واقفة مع واحد ( صاحبها ..زميلها ..جارها ..قريبها …ما يشغلكش !!) ..وهاتك يا ابتسامات ساحرة – قال يعنى عاجبها قوى كلام الهفأ – وهى ّ بتشاغل واحد تانى من تحت لتحت ..مسنتح عينيه عليها ..على أساس ان كل اللى حواليهم فى البلالا !!

** انك تلاقى .شاب ..بالغ .عاقل..راشد ..ساب مكانه لراجل عجوز أو ست كبيرة عشان تقعد مكانه !!

** انك ما تحسّش ان الراجل اللى بيقطعلك التذاكر ..وبتاع الأمن اللى على ماكينة التذاكر ..و عامل النظافة ..وسوّاق المترو – لما تشوف وشه سريعا – والمترو داخل على المحطة- …انك ما تحسش ان الناس دى كلها ..كارهاك ..وكارهة البلد ..والحياة نفسها !!

فى الميكروباص والمينى باص

** انك تلاقى ميكروباص جديد ..ونضيف فى وقت واحد !!

** انك تلاقى سواق ما بيسمعش جورج وسوف ..أو مصطفى كامل ..أو ..المطربين الشِعْبيين تِمّن !!

** انك تلاقى تبّاع ضوافره نضيفة !!

** انك تلاقى تبّاع مش لابس شبشب !!

** انك تلاقى تباع محترم !!

** انك تلاقى سواق وتبّاعه بيشتموا بالأخ والأخت بس ..مالهمش دعوة بالأب والأم …منتهى الاحترام يعنى !!

** انّك ما تسمعش هذه العبارات الخالدة :

( العربيّة فاضية ورا يا افندية !! ) = العربية بقت علبة سردين !!

( فيه كرسى فاضى على الكنبة اللى ورا !! ) = يعنى اقعد على حِجْر الناس اللى ورا !!

( شيل الشنطة اللى على الأرض يا أستاذ ..كده انت وقّفتلى الدنيا !! ) = يعنى مش عاجبك تشيلها ..يبقى حتتشتم وتتهزّأ !!

( سِنّة جنبك يا أستاذ ..الناس هتقع فى الشارع !!) = يعنى ما تسيبش ال 2 سنتيمتر اللى جنبك دول ..وكشكش نفسك فيهم ..ما تعملش مهم ..والّا ..حتتشتم برضو وتتهزّأ !!

( اللى نازل المحطة اللى جاية يقرّب ع الباب يا افندية !! ) = يعنى قوم نحرر نفسك ..ما تبقاش جبلّة ..عاوزين نركّب غيرك ..بقالك كتير مآنسنا !!

( مفيش فكّة خاااااالص يا أفندية ..احنا لسّه فى اول دور

المزيد

عجائب الدنيا المصرية(1) !! ( مصر اللى مش فى دماغها )

أكتوبر 19th, 2009 كتبها عادل حجازى نشر في , مصر اللى مش ف دماغها !!!, مقالات,

فى الشوارع

** انك تلاقى شارع طويل جدا مليان شجر والشمس فى السما مش باينة من كتر الشجر !!

**انك تلاقى ناس مستنيّة الإشارة تبقى حمرا عشان تعدّى !

**انك تلاقى شارع مطبّاته محطوطة فى مكانها الصحيح فعلا !

** انك تتوه ..وتلاقى واحد يدلّك على العنوان صح ( معجزة )..انّه يقولّك مش عارف ( خارقة من الخوارق !)

** انك تلاقى دورة مياه عمومية ببلاش (معجزة)..نضيفة وتصلح لاستخدام الحيوانات مش البنى ادمين ..( عجيبة من عجائب الدهر ) !

** انك تلاقى شارع ضلمه ..مفيهوش ولد وبنت مستهبلين فى امّها !

** انك تلاقى اسماء شوارع لشخصيات معروفة ..غير حارة العبيط ..وشارع الدهولّ..وسكة البغّالة !!

** انك تلاقى شارع تعرف تركن فيه – لو بتاع عربيات يعنى ! – بعد الساعة 9 الصبح !

** انك تلاقى شارع ..وسبحان الله ..فيه محلات بتبيع كتب غير فروع الهيئة المصرية للكتاب !

** انك تلاقى شارع مفهيوش غير عشر قهاوى بس !!

**انك تلاقى شارع مفيهوش غير تلات محلات موبايل بس ..باكسسواراته بسشواراته ببوكسراته بهَجْصْ راته !!!

**انك تلاقى شارع مفيهوش ولا محل بيبيع أكل !!

** انك تلاقى شارع مفيهوش حد فارش فرشة عليها عيش بلدى ..والمعجزة ..مفيش دبّان على العيش !!

** انك تلاقى شارع الرصيف بتاعه سليم ويصلح للمشى ومفيش عليه بياعين بيبيعوا اى حاجة ممكن تتخيّلها …باتنين ونص ..وتعالى بص !!!

** انك تلاقى شارع تتفوّق شهرته فى الهلس السرى غير شارع جامعة الدول العربية !!

** انك تلاقى شارع خالى من الحركة والحياة قبل طلوع الفجر !!

** انك تلاقى شارع فيه محل بيفتح جديد.. ومش مشغّل دى جى مِلَسْوَع بيه ودان اللى رايح واللى جاى ..أو فيه صوان عزا ..وصوت المقرىء مش جايب لحد وهران فى الجزائر ..أو صوت فرح ..أو زفة ..مش جايب لحد طنجة فى المغرب !!

المزيد

مصر اللى مش فى دماغها (القنبلة النووية ..مشاهد مرعبة (فيديو) -)

أكتوبر 14th, 2008 كتبها عادل حجازى نشر في , مصر اللى مش ف دماغها !!!,

بجد ….بعد المشاهدة لهذا الفيديو (المخيف ) …الكلام بيبقى صعب جدا

لكن

حجم المعلومات المفزعة اللى قريتها عن القوى النووية …والارهاب النووى …والتطور المخيف فى هذه الصناعة

بجد

خلّانى اترعب على بكرة

وعلى حالنا

وعلى مصر اللى مش فى دماغها

والعرب اللى مش فى دماغهم

والاهم ….المسلمين اللى مش فى دماغهم الّا من رحم ربى

والى كل من يتحدث عن تطهير العالم من الاسلحة النووية

أهديه هذه المعلومات …هو ….وكل غافل !!

0000000000000000000000000000000000

قامت القوى النووية السبع الكبرى في العالم بـ2059 تجربة ذرية منذ انفجار اول قنبلة من هذا النوع في صحراء نيومكسيكو في الولايات المتحدة في 16 تموز/يوليو 1945.

ووحدها الولايات المتحدة وروسيا وفرنسا وبريطانيا والصين تعتبر قوى نووية رسمية بموجب معاهدة عدم الانتشار النووي لانها اجرت تجاربها قبل 1967. اما الهند وباكستان فقد اصبحتا قوتين نوويتين بحكم الامر الواقع. بحسب فرانس برس.

وتحتل الولايات المتحدة الدولة الوحيدة التي القت قنابل ذرية على دولة عدوة (هيروشيما وناغازاكي في اليابان في آب/اغسطس 1945) المرتبة الاولى بين بلدان هذا “النادي النووي” بـ1032 تجربة اجرتها متقدمة على الاتحاد السوفياتي (715 تجربة).

وقامت فرنسا بـ210 تجارب من1960 في الجزائر ثم في المحيط الهادىء. وجرت التجربة الاولى في الصحراء الكبرى في الجزائر. وبدءا من الثاني من تموز/يوليو 1966 اجرت تجاربها في جزر موروروا وفانغاتوفا جنوب المحيط الهادىء.

واجرت فرنسا تجاربها النووية الست الاخيرة بين ايلول/سبتمبر 1995 وكانون الثاني/يناير 1996. اما بريطانيا فقد اجرت 45 تجربة. كما اجرت الصين 45 تجربة اولها في 16 تشرين الاول/اكتوبر 1964. وبعد تجربتها الاخيرة في التاسع والعشرين من تموز/يوليو اعلنت بكين تعليق تجاربها النووية.

وقامت الهند باول تجربة في 1974 تلتها خمس تجارب اخرى في 11 و13 ايار/مايو 1998 في صحراء راجستان. وتبعتها “شقيقتها العدوة” باكستان في 28 و30 ايار/مايو بست تجارب نووية في منطقة بلوشستان الصحراوية.

المزيد